正值流感高峰期，唔少人有流鼻涕、鼻塞等症狀。你以為係傷風感冒，但一直有黃綠鼻涕，拖好耐都唔好？有可能係鼻竇炎作怪！

鼻竇炎係指鼻腔及鼻竇裡面嘅黏膜壁發炎。急性鼻竇炎一般同呼吸道病毒感染引致嘅傷風感冒有關， 患者會出現咳嗽、鼻塞或流鼻涕、發燒、頭痛、面部脹痛等症狀。

而慢性鼻竇炎就係症狀持續至少12週，可能係因為感染、鼻瘜肉增生或鼻中膈彎曲所導致。分泌物難以排出以致鼻黏液堆積，呼吸會變得困難，鼻竇周圍嘅眼部及面部都會有可能感覺腫脹、疼痛或壓痛。

 

 

經診斷之後，醫生會根據鼻竇炎嘅類別處方藥物。

急性鼻竇炎：抗生素消炎殺菌、滴鼻藥水收縮血管消腫，令鼻竇和鼻腔嘅通道更暢通。

慢性鼻竇炎：類固醇噴鼻劑幫助鼻黏膜收縮，令鼻腔保持暢通；抗組織胺藥物收鼻水和控制鼻水倒流嘅情況。

洗鼻有助治療鼻敏感及鼻竇炎，受鼻竇炎困擾嘅患者可以早、晚洗鼻，沖走鼻內污糟物質和細菌，有效緩解症狀。
 

 

 

嘉賓： 香港中文大學耳鼻咽喉 – 頭頸外科學系名譽臨床助理教授 杜永禧

影片來源：RTHK 香港電台